قصيدة جميلة اعجبتني

من بغا الفرقا لقا له عذر واسباب ودليل ** خل عند العذر والاسباب دام الحب ضاع

كان ودك بـالفراق أبشر عسى عمرك طويل ** لا تردد وانت لك كلمة ولد امرٍ مطاع

لي عليك انك تبت بكلمة تشفي الغليل ** ولك علي أني لا وقف وقفة الرجل الشجاع

لا تجاملني مخافة قال مدري خوف قيل ** عمر هرج الناس ما يسمن ولا يغني جياع

كان قصدك سر حبك أوعدك لاصبح بخيل ** واحمل السرارك معي للموت قدر المستطاع

بس قلها قل : ماحبك وابشر بصبر جميل ** لا تحسب اني مثل من طبعهم لوي الذراع

صاحبك ماهو كذا يا صاحب القد النحيل ** صاحبك طبعه غريب وغربته غربة طباع

فالهوى ما يقبل احل الوسط ولا القليل ** مثل ماهو لا شرى يشري ليامن باع باع

ثابت لو هي تميل الارض حدره ما يميل ** يدري ان الفقر ما هو عيب والدنيا متاع

ما عشق لذة حياته كثر عشق المستحيل ** ولا كره حتى مماته كثر كره الانصياع

كم تعلم من حياة البدو وش معنى الرحيل ** وكم تعلم من غروب الشمس وش معنى الوداع

كم تعلم من سحاب الصيف وش معنى الحصيل ** وكم تعلم من ليال البرد وش معنى الضياع

ايه انا هذا طريقي موحش وصعب وطويل ** وانت لا منك تعبت العالم فجوجه وساع

اعتبرني في بداية سكتك عابر سبيل ** ورح وانا قلبي معك من وين وجهت الشراع

يكفي اني لا ذكرت في سالفة عشاق قيل : ** (( عاشر احبابه شجاع .. وفارق احبابه شجاع ))